Хождение игумена Даниила

ЖИТЬЕ И ХОЖЕНЬЕ ДАНИЛА, РУСЬСКЫЯ ЗЕМЛИ ИГУМЕНА

      Се аз недостойныи игумен Данил Русския земля, хужши во всех мнисех, смеренный грехи многими, недоволен сый во всяком деле блазе, понужен мыслию своею и нетерпением моим, похотехь видети святый град Иерусалима и землю обетованную. И благодатию божииею доходих святаго града Иерусалима и видех святая места, обходих всю землю Галилейскую и около святаго града Иерусалима по святым местом, кудаже Христос бог наш походи своима ногама и велика чюдеса показа по местом тем святым. И то все видех очима своими грешныма, беззлобивый показа ми бог видети, егоже жедах много дний мыслию моею. Братиа и отци, господие мои, простите мя грешнаго и не зазрите худоумью моему и гробости, еже писах о святем граде Иерусалиме, и о земли той блазей, и о пути, еже к святым местом. Иже бо кто путем сим ходил с страхом божиим и смереньем, не погрешить милости божия николи же. Аз же неподобно ходих путем сим святым, во всякой лености и слабости и во пьянстве и вся неподобная дела творя. Но обаче, надеяся на милость божию и на вашу молитву, да ми простить Христос бог моих грехов бещисленых, да си исписах путь си и места сии святая, не возносяся ни величаясь путем сим, яко что добро створив на пути сем, не буди то: ничтоже бо добра сътворих на пути сем; но любве ради святых мест сих исписах все, еже видех очима своима, дабы не в забыть было то, еже ми показа бог видети недостойному. Убояхся онаго раба лениваго, скрывшаго талант господина своего и не створившего прикупа им да сие написах верных ради человек. Да кто убо, слышав о местех сих святых, поскорбл бы ся душею и мыслию к святым сим местом, и равну мзду приимут от бога с теми, иже будуть доходили святых сих мест. Мнози бо дома суще, в местех добрыми своими делы достигають мест сих святых, иже болшую мзду приимут от бога спаса нашего Исуса Христа. Мнози бо доходивше святых сих мест и святый град Иерусалим и възнесшеся умом своим, яко нечто добро сетворивше, и погубляють мзду труда своего, от них же первый есмь азъ; мнози бо, ходивше святаго града Иерусалима, пойдут опять, много добра не видевши, тщаще опять вскоре, а сего пути нелзе вcкоре сотворити ни истоком того мощи и вся святаа та места и в граде и вне града.
      О Иерусалиме, о лавре. Аз недостои игумен Данил, пришед в Иерусалим, пребых месяц 16 в месте в лавре святаго Савы и тако могох походити и испытати вся святая си места. Невозыожно бо без вожа добра и без языка испытати и видети всех свяхых мест. И что имея в руку моею худаго моего добыточка е, то от того все подавах ведущиим добре вся святаа места в граде и вне града, да бьша ми указали все добре, якожь и бысть. И пригоди ми бог налести в лавре мужа свята и стара деньми и книжна вельми. Тому святому мужеви вложи бог в сердце любити мя худаго, и тои указа ми добре вся святаа та места, и в Иерусалиме и по всей земли той поводи мя и до Тивириадскаго моря поводи мя, и до Фаворы, и до Назарефа, и до Хеврона, и до Иордана, и по всем местом поводи мя, и потрудися со мною любве ради. И ина святаа места вндех многа, яже последи скажу.
      О Иерусалиме. Есть же святый град Иерусалим в дебрех, около его горы камены и высокы. Да полны пришедше близько граду тоже видети первое столп Давидов и потом, дошедше мало, увидети Елеоньскую гору и святаа святых и Воскресение церквь, идеже есть гроб господень, и узрети потом весь град. И ту есть гора равна от пути близ града Иерусалима, яко версты вдале; на той горе сседают с конь вси людие и поставляют крестьци ту и поклав:яются святому Воскресению на дозоре граду. И бывает тогда радость велика всякому христианину, видевше святый град Иерусалим, и ту слезам пролитье бывает от верных человек. Никто же бо можеть не прослезитися, узрев желанную ту землю и места святаа вида, идеже Христос бог нашь претерпе страсти нас ради грешных. И идут вси пеши с радостию великою к граду Иерусалиму. И ту есть на левой руце, у пути тамо идучи, церкви святаго Стефана первомученика; на том месте побиен бысть камением Стефан первомученик от июдей, и ту есть гроб его. И ту есть гора камена плоска, проселася в распятие Христово; то зоветься адъ; есть близь стены градныя, яко повержет. И потом входять в святый град Иерусалим вси людие с радостию великою враты, сущими близь столпа Давидова, и та суть врата от Вифлеома лиць, и ту суть врата Вениаминова. Яко войдуче в град путь есть сквозе град в святая святых на правую руку, а на левую к святому Воскресению, идеже есть гроб господенъ.
      О церкви Воскресения господня... Есть же церковь та Воскресение образом кругла, всямокачна и в дле и в преки имать же сажень 30. Суть же в ней полати пространьны, и тамо горе живет патриарх. И есть же от дверей гробных до стены великаго олтаря сажень 12. Ту есть вне стены за олтарем пуп земли, и создана над ним комарка, и горе написан Христос мусиею и глаголеть грамота: "се пядию моею измерих небо и зеылю".
      О месте среди земля, идеже распяться Христос. А от пупа земнаго до распятия господня и до края есть сажен 12. Есть же распятие господне к востоку лиць, есть же на камени высоко было, яко стружия выше. Камень же тый был кругол, яко горка мала. А посреди камени того, на самом верху, высечена есть скважня лакти во глубле, а в шире мний пяди круг, и ту был водружен крест господень. Исподи же под тем каменем лежить первозданнаго Адама глава; и в распятие господне, егда на кресте господь наш Исус Христос предасть дух свой, и тогда раздрася церковная катапетазма, и камение распадеся; тогда же и т камень проседеся над главою Адамлею, и тою разселиною сниде кровь и вода из ребер владычень на главу Адамову и омы вся грехы рода человеча. И есть разселина та на камени том и до днешняго дне; знати есть на десней стране распятия господня знамение то честное.
      О Ердане. Иордань же река течеть быстро, бреги же имать обон пол прикруты, а отсуду пологы; вода же мутна велми и сладка пити, и несть сыти пиюще воду ту святую; ни с нея болеть, ни пакости во чреве человеку. Всем же есть подобен Иордан к реце Сновъстей и вшире, и в глубле, и лукаво течет и быстро велми, яко же Снов река. Вгубле же есть 4 сажень, среди, самое купели, яко же измерих и искусих; сам собою, ибо пребродих на ону страну Иордана, много походихом по брегу его: вшире же есть Иордан, яко же есть Сновь на устии. Есть же по сей стране Иордана на купели тои, яко леси древо не высоко, аки вербе подобно ест выше купели тоя на брегу Иорданову стоит яко лозие много, но несть якоже наша лоза, но некако аки силяжи подобно есть; есть же и тростие много; болоние имать яко Сновь река. Зверь мног ту и свинии дикии бещисла много, и пардуси мнози, ту суть лъвове же.
      Обон пол Иордана горы высоки каменыя и суть подаль от Иордана; а под теми горами другыя горы близь суть белы, и ты суть близ Иордана; и то есть земля Заулоня и Нефоалимьдя обон пол Иордана.
      О пещере Илии пророка. И ту же есть другая пещера дивна, идеже жил святый Илия пророк с Елисеем учеником его. И то все благодатию божиею видехом очима своима грешныма и недостойныма. И сподоби мя бог трижды быти на святем Иордане, и в самы водокрещный, праздник быхом, на Иордане, видехом благодать божию, приходящюю на воды иорданьскыя, и множьство народа безчисла тогда пришедших к воде; всю нощь ту пение бывает изрядно и свещь безчисла горящих и в полунощи бывает крещение воде; тогда бо и дух святый приходит на воды иорданскиа, и видять достойнии человеци добрии, а вси народи не видять ничтоже, но токмо радость и веселие бывает тогда в сердци всякому християнину, и егда рекут: "во Иордане крещьшутися, господи", тогда вси людие в воде и крестьяться в полунощи в Иерданьстей реце, яко же и Христос в полунощи крестился есть. И ту есть гора, высока зело, обон пол Иордана; видети ю есть отвсюду издалеча, и на той горе пророк Моисий преставился есть, видев землю обетованную...



   назад       далее   

Rambler's Top100