Физиолог

Слово и сказание о зверех и птицах

      Фисилог [рече] о льве. Три естества имать лев. Егда бо раждаеть лвица, мертво и слепо раждаеть, седить же и блюдеть до третьего дни. По трех же днех приидеть лев и дунеть в ноздри ему и оживеть. Тако и [о] верных языцех: прежде бо крещениа мертвы суть, по крещении же просвещаються от святаго духа. Второе естество лвово: егда спит, а очи его бдита. Тако и господь наш рече ко июдеом: якоже аз сплю, а очи мои божественыа и сердце бдита. А третьее естество лвово: егда отбогает лвица, хвостом своим покрывает стопы своя, да не может ловець осочити следа его. Тако и ты, человече: егда творищи милостыню, да не чюет левая рука, что творит десница твоя, да не возбранит дьявол делом помысла твоего.
      О слоне. Слон живет на горах. Слоница обрящет былие, нарицаемое мандрагураи, и взимает от нея. Такоже и слон, и гониться с нею. И егда раждаеть, взыдет в реку до вымене и раждаеть в воде, спить же при древе. Да егда падется от него, вопиеть, и приидеть слон велик и не может возвести его и пакы друзии 12, да ни ти. Да тогда же возопиета оба на десяте, и приидет ин мал и подложит рог свои и козметь и. Сиречь первыи слон Евга, вторыи Адам. Былие - древо преслушания.

      [И. д. т., обычное символическое толкование.]

      Об орле. Орел живет лет сто. И ростеть конець носа его, и ослепнета очи его, да не видит и не может ловити. Да возлетит на высоту, свержет себе на камень, и уломиться конец носа его, и куплеться во злате езере, и сядет прямо солньцю. Да егда ся согреет, спадут чешюи с него и пакы птенець будет. Тако и ты, человече: егда много согрешиши, взыди на высоту, сиречь в веру, и плачися предложение греха и измыися слезами своими, согреися в церкви и сверзи с себе грехи.
      О финиксе. Финикс красна птаха есть, паче всех, и павы краснеи: пава бо ли златом, ли сребром образ иметь, а финикс уакинфов и камениа многоценна. Венец носит на главе и сапогы на ногу, якоже царь; есть же близ Индея, близ солнечна града. Лежить же лет 500 на кедрех ливаньских без брашна, питает же ся от святаго духа и по пяти сот лет исполняеть крыле свои от добрых вонь. И клепает ереи солнечнаго града, и идет птаха та ко иерееви и входит во церковь, сядет на степени олтарном иереи со птахою, и будет все попел. И за утра приидет ереи и обрящет ю совершену, якоже и преже была, и целует ю иереи и пакы отъидет на свое место.

      [Далее - обычное символическое толкование.]

      О горлици. Горлица мужелюбица птах есть. Да аще бо погибнет един ею, отходит другая в пустыню и сядет на усхле древе, плачющись подруга своего, и к тому не спряжеться с инемь николиже. Тако и ты, человече, отлучился еси жены своея, к тому не прилепися к инеи.
      О дятле. Дятел пестра птица есть, живет же в горах и ходит на кедры и клюет носом своим. Да где налезеть мякко древо, ту творит гнездо свое. Тако и дьявол бореться со человекы. Да в нем же налезет слабость и небрежение молитвы, внидет вон и возгнездиться; в нем же ли обрящет бодрость, бежит от него.



   назад       далее   

Rambler's Top100