Повесть о новгородском посаднике Щиле

Сказание о Щилове монастыре, иже в Великом Новеграде

      Бе в великом Новеграде некто посадник именем Щил, при архиепископе того же града Иванне. Имея же у себя сына единочада. Живущу же ему в богатстве мнозе. Мнози же людие, купцы, не имуще кун, взимаху у него сребро на торговлю в куны, имаше же лихвы на 14 гривень и 4 денги точию по единой денге на год - боле же того отнюд не имаше. Сбора же таковаго имения многое множество, и восхоте на то кунное собрание воздвигнути церков и соградити монастырь, и взем у архиепископа Иванна благословение на здание церкви во имя пречистые богородицы честнаго ея покрова. Наят же делателя многи и созда церков близ реки Волхова, на лугу, от града яко два поприща. Бывшу же и архиепископу на основании же тоя церкви со священным собором. Вопросившу же архиепископу Щила, от какова имения воздвигнута церков. Егда совершена бысть церкви, Щил же моли архиепископа освятити церков, понеже о том вначале не вопросил его, егда испроси благословение. Он же исповеда ему истину, яко от лихвенаго собрания создана бысть церкви. Архиепископ же рече ему: "Уподобился еси Исаву; лестию взем благословение от мене на таковое божественное дело. Ныне же повелеваю ти ити в дом свой, и повеле у здания своего в стене устроити гроб, и повеж вся своя тайны отцу своему духовному, и вздев срачицу и саван и вся яже суть подобна на погребание мертвым, и лязи в создании своем во гробе оном, и повеле и надгробное отпети - и бог, всех нас сведый тайная сердец, елико хощет, то и сотворит. Мы же ко освящению готови будем". Щил же в недоумении велице быв. Рыдая и плачася, иде в дом свой - повеления же святителева не сме преслушати - вскоре вся повелевает устроити заповеданная святителем. Егда же надгробное пение соборне отпеша над ним, внезапу не обретеся гроб с положенным в нем, и бысть в том месте пропасть. Святителю же пришедшу на освещение церкви по молению Щилову, видит страшное оно и ужасное видение, страха и трепета и исполнь, и повеле иконописцем написати вапы на стене видение, поведающе о брате Щиле во адове дне, над всем гробо его, и несвящену церков повеле запечатлети, дондеже изволит бог о нем своего человеколюбия смотрением, и отиде в дом святей Софеи. Сын же Щилов, видя отчю погибель и свое лишение, в велице недоумении бысть, и прииде ко святителю, ища спасения и помощи лишеной души отца своего. Святитель же пьвеле ему молити бога о отчи погибели и в посте и во бдении пребывати, и повеле на 40 дней у 40 церквей сорокоусты дати священником с причетникы доволно, да поют в ты дни по 40 анахид и литургий неизменно, и в ту 40 дний милостыню безпрестанно творити - егда же совершатся 40 дней, пришед, возвести нашему смирению. Сын же Щилов, по заповеди святителя вся совершив в 40 дней, и возвести святителю. Святитель же от клироса своего посылает архидиякона к запечатленной церкви и повелевает, сокровенне распечатав церков, дозрети разумно, идеже пропасть гроба и над нею стенное писание, и соглядав известно паки запечатлети церков и возвестити себе о сем. Архидиякон же по повелению святителя соглядав вся разумне и видит в надстенном писании, иже над гробом, Щила во аде во гробе - главу же его вне ада, и возвести о сем святителю. Святитель же заповеда сыну Щилову паки вторую 40 дний такожде сотворити, яко же напреди изявися, и егда совершатся, паки возвестити себе о сем. Той же заповеданная паки совершив, и возвещает святителю о сем. Святитель же паки посла архидиякона своего по прежнему обычаю соглядати о нем в надстенном писании. Архидиякон же виде в настенном писании Щила во гробе и з гробом вне ада до пояса и возвести о сем святителю. Святитель же пакы повелевает сыну Щилову по прежнему обычаю 40 дний третицею сотворити. Той же по заповеди совершив и возвещает святителю о сем. Святитель же третицею посла архидиякона своего по прежнему обычаю соглядати о нем стеннаго писания. Архидиякон же виде в надстенном писании Щила вне ада з гробом всего изшедша. Тако же и гроб его верху земли обретеся над пропастю. Пропасти же не бе видети. Во гробе же весь цел обретеся, якоже и положен. И сия вся архидиякон возвести святителю. Слышав же сия архиепископ и приим извещение от бога, подвижеся соборне к запечатленной церкве ко освящению и сицевое чюдо предивное, и ужаса и страха исполнь, хотя видети своим очима. Видев же сия вся архиепископ, всякого удивления исполнь, благодарив бога о недоведомых и непостизаемых его судбах праведных, и пев соборне надгробная пения над гробом Щиловым, и церковь освятив во славу Христу богу нашему и пречистей его богоматери. И оттоле устроися монастыр, нарицаемый Щилов, идеже и до ныне стоит. Нецыи же глаголют: архиепископ заповеда сыну Щилову по 3-жды на год по сту литургий пети в три лета. И сие до зде.



   назад       далее   

Rambler's Top100