Сказание о князьях Владимирских

Сказание о князех Владимирских

      ...И в то время некии воевода новогородцкий, именем Гостомысл, скончевает свое житье и созва вся владелца Новагорода, и рече им: "о мужие новогородьстии, совет даю вам аз, яко да пошлете в Прусьскую землю мужа мудрыя и призовите от тамо сущих родов себе владелца. Они же шедше в Прусьскую землю и обретоша тамо некоего князя именем Рюрика, суща от рода римъскаго Августа царя, и молиша князя Рюрика посланьницы от всех новогородцов, дабы шел к ним княжити. Князь же Рюрик прииде в Новъгород, имея с собою два брата, имя единому Трувор, а другому Синеус, а третеи племянник его с ним, имянем Олег; и от того времени наречен бысть великий Новград, и нача князь великии Рюрик первыи княжити в нем в лето 6375. От великаго князя Рюрика великии князь Владимер 4-е колено, иже просвети Рускую землю святым крещением в лето 6496.
      Поставление великих князей русских откуду бе, и како начаша ся ставити на великое княжение святыми бармами и царским венцем.
      В лета 6622 бысть сии князь великий Владимер Всеволодовичь, Манамах, князь великий киевъскии, правнук великаго князя Владимера, просветивъшаго Русскую землю, от него же 4-е колено. Той бо Мономах прозвася от таковыя вины.
      Егда седе в Киеве на великое княжение, начат съвет творити со князи своими и з боляры и с велможи, глаголя тако рече: "егда аз мал есмь преже мене царствовавших и хорюгви правящих скипетра великия Росия, якоже князь великии Олег ходил и възял со Царяграда велию дань на вся воя своя, и потом великии князь Всеслав Игоревич ходил и взял на Констянтине граде тяжчаишую дань. А мы есмя божиею милостию настолницы своих прародителей и отца своего великого князя Всеволода Ярославича и наследницы тоя же части от бога сподоблены, и ныне убо съвет ищу от вас, моея полаты, князей, и бояр, и воевод, и всего над вами христолюбиваго воинства, и да превознесется имя святыя и живоначальныя троица вашея храбрости могутством божиею волею с нашим повелением, и кии ми съвет воздаете?" Отвещаста же великому князю Владимеру Всеволодовичю князи и боляря его и воеводы и реша ему: "сердце царево в руце божии, якоже есть писано, а мы есмя вси раби твои под твоею властию". Великии же князь Владимер збирает воеводы благоискусны и благоразумны и благоразсудны, поставляет чиноначалники и сотники и пятидесятники, и совокупи многи тысяща воинств и отпусти их на Фракию Царяграда области, и поплениша их довольно, и возвратишася со многим богатеством здрави во свояси.
      Тогда бе во Цареграде благочестивый царь Констянтин Манамах, и в то время брань имея с персы и с латины. И составляет съвет благ премудрый царьскии, отряжает убо послы своя к великому князю Владимеру Всеволодовичю митрополита ефесскаго Неофита от Асия и с ним два епископа, митулинскаго и мелетинскаго, и стратига антиохийскаго, игемона иерусалимского Иеустафия и иных своих благородных. От своея же царьския выя снимает животворящии крест от самого животворящего древа, на немъже распятся владыка Христос, снимает же от своея главы царский венец и поставляет его на блюде злате; повелевает же принести крабейцу сердоликову, из нея же Августия царь римскии веселящеся, посылает же и ожерелие, сиречь святыя бармы, иже на плещу свою ношаше, и чеп от злата аравитскаго сковану и ины многи дары царьския, и дасть их митрополиту Неофиту и епископом и своим благородным посланником и отпусти их к великому князю Владимеру Всеволодовичю, моля его и глаголя: "Приими от нас, боголюбивыи и благоверныи княже, сия честные дарове, иже от начатка вечных лет твоего родства и поколениа царьских жребии на славу и честь на венчание твоего волнаго и самодержавнаго царствия. О нем же начнут молити тя наши посланницы, что мы от твоего благородия просим мира и любве, яко да церкви божия безмятежна будут и все православие в покои да пребудет под сущею властию нашего царства и твоего волнаго самодержавства великия Росия, да нарицаешися боговенчанный царь, венчан сим царьским венцем рукою святейшаго митрополита кир Неофита с епископы". И с того времени князь великии Владимер Всеволодович наречеся Манамах, царь великия Росия, и потом пребыста прочаа времена с царем Констянтином князь великии Владимер в мире и любви. Оттоле и доныне тем царьским венцем венчаются великии князи владимерстии, его же прислал греческий царь Констянтин Манамах, егда поставятся на великое княжение росииское...



   назад       далее   

Rambler's Top100