Степенная книга

Книга степенная царского родословия

      О великом князе Игоре, како сочьтася со блаженною Ольгою. Игорю же юну сущу, еще и бывшу ему во Псковской области, яко же нецыи поведаша дивно сказание, яко некогда ему утешающуся некими ловитвами и узре об ону страну реки лов желанный; и не бе ему возможно преити на ону страну реки, понеже не бяше ладьици, и узре некоего по реце пловуща в лодейцы, и призва пловущаго к берегу, и повеле себя превестн за реку. И пловущим им, и возре на гребца оного и позна, яко девица бе сия блаженная Ольга, вельми юна сущи, доброзрачна же и мужествена, ея же иногда никогда же не зная, и уязвися видением, яко же писано есть: очи лакоме и некасаемых касахуся. И разгореся желанием на ню и некия глаголы глумлением претворяше к ней. Она же, уразумевше глумления коварство, пресекая беседу неподобнаго его умышления, не юношески, но старческим смыслом поношая ему, глаголаше, что "всуе смущаешися, о княже, срам привтворяя ми. Вскую неподобная во уме совещевая, студная словеса износиши? Не прельщайся, видев мя юну девицу и уединену, и о сем не надейся, яко не имаши одолети ми; аще и невежда есмь, и велми юна, и прост обычай имам, яко же мя видиши, но обаче разумех, яко поругати ми ся хощеши и глаголеши нелепая, яко же не хощу ни слышати: прочее же внимай себе и останися таковаго умышления; дондеже юн еси, блюди себе, да не одолеет ти неразумие и да не постражеши зло некое, останися и всякого безакония и неправды. Аще сам уязвен будеши всякими студодеянии, то како можеши инем неправду возбранити и праведно судити державе твоей? Разумно же да будет ти, аще и паки ныне не престанеши, соблажняяся о моем сиротстве, то уне ми есть, яко да приимет мя глубина реки сея, да не буду тебе на соблазн и сама поругания и поношения угозну, ты же прочее не смущаешися о мне". И ина много премудрено о целомудрии глаголя. Се начаток благ и удивления достоин юношскаго целомудрия блаженныя Ольги; еще не ведущи бога и заповеди его не слыша, такову премудрость и чистоты хранение обрете от бога, яко удивитися Игорю мужеумному смыслу ея и благоразумным словесем ея. И абие Игорь, отложь юношеское мудрование свое, наипаче же со стыдением своим и с молчанием преиде реку, внимая себе от таковых до времени, и оттоле паки иде в Киев. Внегда же прииде время и по-велению его бывшу изобрести ему невесту на брак, взысканию же бывшу, яко же есть обычай господьству и царьстей власти, и о мнозех небреже, но воспомяну дивную в девицах Ольгу, юже виде своима очима мужествену сущу и благообразну и еже от уст ея слыша хитростныя глаголы и целомудреный нрав ея видев, и посла по нея сродника своего прежереченнаго Ольга; и приведе ю с подобающей честию, и тако сочьтана бысть ему законом брака.

      О благочестивом и богом утверженом одолетели супостатом, о христолюбивом и великом князе Иване Васильевиче и государе и самодержьце всеа Русии и пророчество Михаила Клопьского. Глава 1. Пресвятая троица, отец и сын и святый дух, единый истинный бог нашь, иже есть сый царь царствующим и господь господьствующим и всея твари содетель и вся, елика хощет, творит на небеси и на земьли, и по своей ему воли дает власть и царство и славу ему же хощет, и скипетры царствия поручает, яко же пишет: "Аще кая земьля управитися пред богом, то поставляет ей и держателя благочестива и правдива и благостройно управляюща и любяща суд и правду". Тако своим неизреченным милосердием постави бодреливаго стража и истинна пастыря, главу благоразумну и правдиву своему тезоименитому достоянию, превозлюбленней его Русьстей велицей земьли, кореноплодному отьчеству изряднаго наследника и крепкаго поборника православию, мужественна исполина и врагом страшьна, всюду супостаты одолевающа и вся враги побеждающа и никим же побежьдаема и всяко нечестие и прелесть разоряюща и всяку ересь потребляюща и всяку вражьду пресекающа и многоначалие и самовластие упражьняющи, иже окрест державы его властодержателей под свою державу покаряюща, от дальних же превысочайших самодержателей во братственную любовь сочататися желаема и во вся коньцы земьныя знаема и славна и пресловуща, мир же и тишину и правду утвержающа, сего настоящаго светлейшаго самодерьжца благовернаго и христолюбиваго и человеколюбиваго великаго князя Ивана Васильевича, всеа Русци государя и царя, именуема Тимофея, иже бысть от святаго и равноапостольнаго великаго князя Владимера Святославича пятыйнадесять степень, от Рюрика же осьмыйнадесять. Сей убо преславный в державных благодатно имя Иван родися в лето 6948, месяца генваря 22. Во время же рожения его прорече о нем инок свят от вельможьска роду, именем Михаил, живый в Великом Новеграде в монастыри Клопьском. И такова прозорлива дара сподобися от бога, яко многажьды прорицаше хотящая преди быти и сия яко настоящая глаголаше. Тако же бысть, егда родися сий великий князь Иван. И тогда внезапу начат звонити в колоколы, и мнози людие снидошася. Он же, яко уродствуя бяше, и всем людем Великаго Новаграда и самому пастырю их, великому архиепискому Еффимию, явственно вопия и глаголаше сице: "Днесь во преславном граде Москве у великаго князя Василия Васильевича родися сын, князь великий Тимофей, сущее же имя ему Иван. И той будет всему Росийскому царствию наследник и всем окрестным странам страшен будет и сего вашего всего Великаго Новаграда обладает и гордыню вашу упразднит и во всю свою волю привлечет вас и все ваше самовластие раздрушит и самовольная ваша обычая изменит и за ваше непокорство и супротивие многу беду и посечение и плен над вами сотворит и богатество ваше и села ваша восприимет", - еже и бысть по летех четыридесятих, еже последи речется...



   назад       далее   

Rambler's Top100