Прение живота и смерти

Повесть и сказание о прении живота со смертию и о храбрости его и о смерти его

      Человек некий ездяше по полю чисту и по раздолию широкому, конь под собою имея великою крепостию обложен, зверовиден, а мечь имея у себя вельми остр обоюду, аки лев видением, а змиино имея жало, разсекая железо а великое твердое камение, оболчен во оружие твердо. И многия полки человек той побивая, и многия силныя цари прогоняя и побежая, и многия силныя богатыри побивая, имея в себе велию силу и храбрость, и разума исполнен и всякия мудрости; и помышляше в себе, глаголя высокая и гордая словеса "есть ли убо на сем свете, на всей поднебесней, кто бы могл со мною битися или противу мене стати, царь, или богатырь, или зверь сильный?" и сице помышляше в себе и глаголаше: "аще бы был аз на облацех небесных, а в земли бы было колце утвержено, и аз бы всею землею подвизал". И бысть абие в велице высокоумии, и внезапу же прииде к нему смерть, образ имея страшен, а обличие имея человеческо, - грозно же видети ея и ужасно зрети ея; и оружия носяше с собою много на человека учиневы: мечи, ножи, пилы, рожны, серпы, сечива, косы, бритвы, теслы и иная многа незнаемая, иже кознодействует различно на разрушение человека. Узрев же ея, храбрый той воин устрашися велми, И душа его смиренная ужасеся, и уды его вострепеташа вси, вмале же укрепися и рече ей: "кто еси, лютый зверю? и страшный образ твой человечь есть и страшен велми".
      Рече же ему смерть: "пришла есми к тебе, а хощу тя взяти".
      Рече ей удалый воин: "аз не слушаю тебе, а тебе не боюся"!
      Рече же ему смерть: "человече суетне, о чем ты мене не боиши? Се бо вси цари, и князи, и святители мене боятся, аз есми велми славна на земли".
      Рече же ей живот: "аз есми силен и храбр, и на ратех многия полки побиваю, а от тех ни един человек не может со мною битися, ни противу мене стати, и ты како ко мне едина пришла еси? И хощеши ко мне приближитися, а оружия с собою носиши много; видишися ты мне не удала и состарела еси многолетною старостию, а конь у тебе аки много дней не едал и изнемог гладом, токмо в нем кости да жилы: аз тебе глаголю кротостию и старость твою почитаю: отъиди скоро от мене, бежи, доколе не поткну тя мечем моим".
      Рече же ему смерть: "аз есмь ни силна, ни хороша, ни красна, ни храбра, да силных, и хороших, красных, и храбрых побораю, да скажу ти, человече, послушай мене: от Адама и до сего времени сколко было богатырей силных, никто же смел противу мене стати: хотела бых того, кто бы противу мене стал и брался бы со мною, но несть: ни царь, ни князь, ни богатыри, ни всякий человек, ни жены, ни девицы, никто же смел со мною братися, - ни юн, ни стар. Царь Александр был Македонский храбр и мудр, и Самсон был силный, и он говорил тако: "аще бы было колце вделано в землю, и аз бы всем светом поворотил", да и тот не смел спиратися со мною; а во Алевите был Акирь премудрый, и то со мною спиратися не смел же; тех аз всех взяла, яко единого от убогих сирот. Был царь пророк Давид и сын его царь Соломон премудр и хитр и мудр был, не было такова мудреца во всей поднебесной, и тот не смел со мною спиратися и противу мне стати, и того аз взяла. Аще ты, человече, не ведаеш, кто есмь аз, аз есми смерть".
      Услышав то человек той сия, зело устрашися сердцем своим и ужасеся умом своим, глагола ей: "госпоже моя, добрая и славная смерть! понеже человек есми храбр, а меч у мене, госпоже, велми остр, токмо битися с тобою не хощу, хощу с тобою, госпоже, мир великий имети: ты, госпоже, смерть зовешися, аз есмь живот именуюсь, что всуе хощеши посещи мене? Ничто же пред тобою вем себе преступивша или которую тебе сотворша досаду. Есть, госпоже, у мене богатества много, - и злата, и сребра, и бисера многоценнаго множество: возми у мене, госпоже моя, что хощеши, токмо смирися со мною и не деи мне к тому и буди ми, госпоже моя, друг любимый и отъиди, госпоже моя, от мене с честию великою, дондеже не прогневагося на тя, и отбежи, госпоже, от мене скоро, дондеже не возгорится ярость моя на тя".
      Рече же ему смерть: "о человече суетне, что всуе сия глаголы безумныя глаголеши, а не поможет ти ничто же: ни слава, ни богатство, ни сила, ни храбрость. Аз убо от тебе не отъиду, а тебе от себе не отпущу, но хощу убо тя ногою моею запяти и на земли тя хощу простерти, яко же и всех человек. Аз есмь ни посулница: и богатества не збираю, ни красного портища не ношу, а земныя славы не ищу, занеже не милостива есми издетска и повадилась есми никого же миловати, ни милую, ни наровлю никому: как прииду, так и возму, но токмо жду от господа бога повеления, как господь повелит в мегновении ока возму, в чем тя застану, в том ти и сужду". Рече живот: "госпоже моя смерть, покажи на мне милость свою отпусти мя ко отцу моему духовному, да покаюся ему, елико согреших".
      Рече же ему смерть: "никако же, человече, не отпущу тя ни на един час. Тем вы прельщаетеся глаголюще: заутра ся покаю, и без покаяния наипаче согрешаете, а мене забываете, а ныне как аз пришла, так и возму. Ко всем моя любовь равна есть: какова до царя, такова и до нища, и до святителя, и до простых людей. Да еще бы аз богатество собирала, ино бы не было и места, где ми его класти, понеже, человече, прихожу аз аки тать в нощи безвесно. Слышал ли еси во Евангелии господа глаголюща: блюдитеся вы на всяк час смерти, не весть бо ни един от вас, когда приидет смерть; приходит смерть аки тать, смерть вам грамоты не пошлет, ни вести не подаст".



   назад       далее   

Rambler's Top100