Повесть об основании Тверского отроча монастыря

О зачатии во граде Тфери Отроча монастыря

      Лета мироздания 6773 составлен бысть Отрочь монастырь тщанием и рачением великаго князя Ярослава Ярославича Тферского и супруги его великия княгини богомудрыя Ксении по совокуплении их законнаго брака в четвертое лето по прошению и молению любимаго его отрока Григория, а в иноческом чину Гурия.
      В лета великаго князя Ярослава Ярославича Тферскаго бысть у сего великаго князя отрок именем Григорий, иже пред ним всегда предстояше и бе ему любим зело и верен во всем; и тако великий князь посылаше его по селом своим, да собирает ему повеленная. Случися же тому отроку быти в селе, нарицаемом Едимоново, и ту обита у церковнаго пономаря именем Афанасия, и узре у него дщерь его девицу именем Ксению, велми красну, и начат мыслити в себе, да оженится ею. И бояся князя своего, да не когда приимет от него великий гнев и велми печален бысть о сем; возлюби бо ю зело и не поведа мысли своея никому от другов своих, но в себе размышляше, да како бы ему улучити желаемое. И случися же наедине со отцем ея Афанасием, начат ему глаголати, да вдаст за него дщерь свою, и обещается ему во всем помогати. Отец же ея велми удивися о сем: "да како у таковаго великаго князя имать предстояти всегда пред лицем его, и тако ли вещает мне о сем", и не ведяше, что ему отвещати противу словес его. Шед убо Афанасий, вопроси о сем жены своея и дщери, сказа им подробну. Дщерь же его, исполненна духа святаго, возглагола отцу своему сице: "Отче мой! сотвори ему вся сия. Елико он тебе обещася, положи на волю его, богу бо тако изволившу и сие да будет".
      Бяше бо девица сия благочестива и кротка, смиренна и весела, и разум имея велик зело, и хождаше во всех заповедех господних, и почиташе родители своя зело, и повинуяся им во всем, от младых ногтей Христа возлюбила и последуя ему, слышаше бо святое писание от отца своего и внимаше прилежно всем сердцем своим.
      Отрок же наипаче того уязвися любовию и прилежно о сем вещает отцу ея, да не устрашается: "Аз бо ти во всем имаюся и князя умолю во всем, ты же не бойся". И тако совещастася во всем и быти в том селе браку и венчатися в церкви святаго великомученика Димитрия Селунскаго, ижити ту, да же великий князь повелит. И тако повеленная великаго князя исполни вся, яже ему повелена быша, и возвратися во град Тферь с радостию и дивляшеся в себе велми, яко нигде таковыя обрете девицы, и неповеда сего никому.
      Отроковица же после сего рече отцу своему и матери: "Господие мои! не дивитеся о сем, что вам обещался сей отрок, он бо тако совеща, но бог свое строит: не сей бо мне будет супруг, но той, его же бог мне подаст". Родители же ея о сем велми дивистася, что рече к ним дщерь их.
      Предреченный же отрок той, усмотря время благополучное и припадает к ногам великаго князя и молит его со многими слезами, и возвещает ему свою мысль, да сочетается законному браку, яко ему годно бысть; красоту и возраст и разум девицы оныя изъявляет. Князь же великий сия от него слышав, рече ему: "Аще восхотел еси женитися, да поимеши себе жену от вельмож богатых, а не от простых людей и не богатых и худейших и безотечественных, да не будеши в поношении и уничижении от своих родителей, и от боляр и от другов и от всех ненавидим будеши и от мене удален будеши стыда ради моего". Однако на многи дни отрок моляше прилежно великаго князя, да повелит ему желание свое исполнити и тамо жити. И тако великий князь наедине его увещавает и вопрошает о всем подробну, чего ради тако восхоте. Он же все исповеда великому князю обещание свое, яко же тамо обещася.
      Князь же великий Ярослав Ярославич по прошению его повелевает всему быть якоже ему годно и потребно, и насад изготовити, и вся воли его потребная, и люди ему тамо готовы быть имеют, елико годно будет на послужение отроку. Когда приспеет время обручению и венчанию его, отпущает его в насаде по Волге реке; бе бо то село близ Волги стоит, а кони ему обещавает прислати за ним вскоре по брегу.
      Отрок же с радостию поклонися великому князю и пойде в насад по Волге реке со всеми посланными с ним.
      На утрие же великий князь повеле готовити себе коня и всему своему синклиту, яко же угодно великому князю, соколы и псы да едучи ловы деет; в ту бо нощь, великий князь сон видел, яко бо быти в поле на ловех и пускати своя соколы на птицы; егда же пусти великий князь любимого своего сокола на птичье стадо, той же сокол, все стадо птиц разогнав, поимал голубицу красотою зело сияющу, паче злата, и принесе ему в недра; и взбнув князь от сна своего и много размышляше в себе, да что сие будет, и не поведа сна того никому, токмо повеле с собою на лов вся птицы взяти; и тако великий князь поиде в ту же страну, идеже отрок, ловы деюще тешася. Бе же великий князь безбрачен и млад, яко двадесяти лет еще не достигшу возраста своего.
      Той же отрок, егда прииде в насаде по реке и приста у брега, ожидающе коней от князя, и посла вестники своя к девице, да вся готова будут, якоже есть обычай брачным. Девица же присланным рече: "Возвестите отроку, да же помедлеет тамо, дондеже сама весть пришлю к нему, како вся изготована будут, понеже бо нам от него о приходе его вести не было". Вестницы же его пришедше поведаша ему о всем, еже им повелено бысть от девицы возвестити. Провиде бо она великаго князя к себе приход и рече родителям своим, яко "уже сват мой приехал, а жених мой не бывал еще, но ужо будет, яко в поле тешится и замедлил тамо, но пождем его немногое время, да же приедет к нам", а о имени его никому от сродников своих не поведа, но токмо готовяше ему честные дары, яже сама строяше; сродницы же ея велми о сем дивляхуся, а того жениха ея не ведяху, но токмо она едина.
      Князь же великий села того не знаяше, но восхоте тамо быти на утрие или на другий день и да видит своего отрока оженившегося; и тако обночева на лове, бяше бо село то от града Тфери четыредесять поприщ; в нощи же той виде сон прежний и наипаче размышляше в себе, что будет сие видение; на утрие же по обычаю своему ловы деяше.
      Отрок же той не дождався вести, ни коней, помысли в себе, яко "аще государь мой великий князь раздумает и пошлет по мене, и велит возвратитися вспять, аз же своего желаннаго не получил". И тако вскоре поиде во двор той, иде же девица та, и по чину своему вся изготовивше. И тако седоста вкупе на место свое, якоже быти вскоре венчанию их, отрок же повелеваше поскору вся строити и дары разносити. Девица же рече отроку: "Не вели спешить ни чем, да еще у меня будет гость незваной, но лучше всех и званых гостей".
      Великий же князь в то время близ бе села того, и увиде стадо лебедей на Волге реке, и тако повеле пустити вся своя птицы, соколы и ястребы, пусти же и сокола своего любимаго и поимаше много лебедей. Той же сокол великаго князя, заигрався, ударися летети на село то; великий же князь погна за ним и приехал в село то борзо, забыв вся; сокол же сяде на церкви святаго, великомученика Димитрия Селунскаго; князь же повеле своим вопросити про село, чие есть. Селяне же поведаху, яко село то великаго князя Ярослава Ярославича Тферскаго, а церковь святаго великомученика Димитрия Селунского. В то же время множеству народа сошедшуся смотрети, яко уже к венчанию хотят итти. Князь же, сия слышав от поселян, повеле своим сокола своего манити; сокол же той никакоже думаше слетети к ним, но крылома своима поправливаяся и чистяшеся; сам же великий князь поиде на двор, идеже бе отрок его, в дорожном своем платье, не на то бо приехал, но богу тако изволившу. Людие же, видевше князя, не знаяху его; мняху бо его с конми и с потехами к жениху приехавша, и не встретиша его никтоже.
      Девица же рече всем ту седящим: "Восстаните вси и изыдите во сретение своего великаго князя, а моего жениха" - они же дивляхуся.
      Великий же князь вниде в храмину, идеже бяху отрок и девица сидяще; всем же воставшим и поклонившимся великому князю, им же не ведущим пришествия его, и прощения просящим; князь же повеле им сести, да видит жениха и невесту.
      Девица же в то время рече отроку: "Изыди ты от мене и даждь место князю своему, он бо тебе больше и жених мой, а ты был сват мой".
      Великий же князь узре ту девицу зело прекрасну и аки бы лучам от лица ея сияющим; и рече великий князь отроку своему Григорию: "Изыди ты отсюду и изыщи себе ты иную невесту идеже хощеши, а сия невеста бысть мне угодна, а не тебе", - возгореся бо сердцем и смятеся мыслию.
      Отрок же из места изыде повелением его; великий же князь поим девицу за руку и поидоста в церковь святаго великомученика Димитрия Селунскаго, и сотвориша обручение и целование о Христе, яко же подобает, потом же и венчастася в той же день; и тако бысть велия радость у великаго князя той день до вечера, бяше бо летом, и селян повеле покоити день и нощь. Идущу же великому князю после венчания от церкви ко двору, тогда оный сокол его любимый виде господина своего идуща с супругою своею, сидя на церкви, начат трепетатися яко бы веселяся и позирая на князя. Князь же вопроси своих сокольников: "Слетел ли к вам сокол или нет?" Они же поведаша ему: "Не летит с церкви". Князь же воззрев на него, кликнул его своим гласом. Сокол же скоро прилете к великому князю и сяде на десней его руце и позирая на обоих, на князя и на княгиню; великий же князь отдаде его сокольнику.
      Отрок же той великою кручиною одержим бысть, и ни яде и ни пия. Великий же князь велми его любляше и жаловаше, наипаче же ему не веляше держатися тоя кручины, и сказа ему сны своя: якоже видел во сяе, тако и сбысться божиим повелением.
      Отрок же той в нощи положил мысль свою на бога и на пречистую его богоматерь, да яко же восхотят к которому пути, тако и наставят. И снем с себя княжее платье и порты и купи себе иное платье крестьянское и одеяся в него и утаися от всех своих, изыде из села того, никому же о сем не ведущу, и поиде лесом незнаемо куды.
      На утрие же великий князь того отрока воспомянув, что его у себя не видит, и повеле своим боляром, да пришлют его к нему; они же поискавше его много и не обретоша нигде, токмо платье его видеша. И великому князю возвестиша о нем. Князь же великий о нем велми печален бысть, и повеле искати его сюду и сюду по реке и в кладезях, бояся того, чтоб сам себя не предал губительной и безвременной смерти; и нигде его не обретоша, но токмо той селянин поведа, что де "купил у меня платье ветхое, и не велел о том никому поведати и поиде в пустыню".
      Великий же князь повеле его искати по лесом и по дебрям и по пустыням, да где его обрящут и приведут его; и многие леса и дебри и пустыни обыдоша и нигде его не обретоша. Бог бо его храняше. И пребысть ту князь даже до трех дней.
      Великая же княгиня его Ксения вся возвести бывшая великому князю Ярославу Ярославичу о себе и о отроке, яже напреди писана суть.
      Великий князь велми бысть печален об отроке своем, глаголаше бо, яко "аз повинен есмь смерти его". Княгиня же его печалитися ему всячески не велит и глаголет великому князю: "Богу убо так угодно изволившу быть мне с тобою в совокуплении; аще бо не божиим повелением, како бы было мощно тебе, великому князю, к моей нищете приехати и пояти мя за себя. Ты же не печалися о сем, но иди с миром во град свой и мене поими с собою, ничего не бойся". Великий же князь велми печален бысть, воздохнув прослезися и воспомяну своя глаголы, яже глагола ко отроку своему Григорию: "Тое на мне сбысться, а его уже отныне не увижу"; и возложи свою печаль на бога и на пречистую его богоматерь и отпусти свою великую княгиню в насаде, и боляр своих, иже были со отроком, во град Тферь, и повеле великий князь боляром своим, да берегут великую княгиню его и поклоняются ей и слушают во всем. Сам же великий князь по прежнему поехал берегом, деюще потехи своя и ловы; и прииде во град Тферь прежде княгини своея. Егда же прииде и великая княгиня его Ксения ко граду Тфери, великий князь повеле боляром своим и с болярынями и своим дворовым и всему граду, да выдут на встретение великия княгини, и с женами своими. Вси же слынщвше от великаго князя, с радостию изыдоша весь град, мужи и зрены, и младенцы от мала даже и до велика с дароношением, и сретоша ея не брезе у церкви Архангела Михаила. Егда же прииде ко граду Тфери, великий князь посла всех боляр с коретами, и тако с великою честию сретоша ю и поклонишася ей; и вси зряще красоту ея, велми чудишася, яко "нигдеже видехом очима нашима или слышахом слухом нашим таковую жену благообразну и светящуся аки солнце во многих звездах, яко же сию великую княгиню, сияющу во многих женах сего града паче луны и звезд многих"; и провождаше ю во град Тферь с честию великою и с дары многими на двор великаго князя. И бысть во граде радость и веселие велие; и бысть у великаго князя пирование на многи дни всякому чину от мала даже и до велика.
      Предиреченнаго же отрока не бе слухом слышати на много время. Божиим же промыслом той отрок прииде на реку зовомую Тферцу, от града Тфери пятьнадесят поприщ, на место боровое, и ту вселися на лесу и хижу себе постави, и часовню на том месте; и назнаменова где быти церкви во имя пресвятыя богородицы честнаго и славнаго ея рождества. И ту пребысть немногое время, и найдоша его ту близ живущие людие, хождаху бо по лесу потребы ради своея; и вопрошаху его, глаголюще: "Откуду ты сюду пришел еси, и как тебя зовут, и кто тебе велел тут вселитися в нашем месте?" Отрок же им не отвеща ничтоже, но токмо им кланящеся, и тако от него отъидоша во свояси.
      Он же ту мало пребысть и от того места отъиде, и хотяше отытти от града подалее, понеже уведа от пришедших к нему людей, яко близ есть град. Божиим же изволением прииде близ града Тфери по той же реке Тферце на устье и вышед на реку Волгу и позна, яко град Тферь есть, ибо знаем ему бе, и возвратися в лес той и избра себе место немного вдалее от Волги на Тферце, и начат молитися пресвятей богородице, да явит ему про место сие. В нощи же той возляже опочинути и в сон тонок сведен бысть, и видит на том месте аки поле чистое и великое зело и свет великий, яко некую лучу божественную сияющу. Воспрянув от сна и мышляше в себе, да что сие будет знамение, и тако моляшеся спасу и пресвятей владычице богородице, да явить ему вещь сию; в ту же нощь паки явися ему пресвятая богородица и повелевает ему воздвигнути церковь во имя честнаго и славнаго ея успения и указа ему место и рече: "Хощет бо бог прославити сие место и распространити его, и будет обитель велия; ты же иди с миром во град ко князю своему, и той помощник тебе будет во всем и прошение твое исполнит. Ты же егда вся свершиши и монастырь сей исправиши, не многое время будеши ту жити и изыдеши от жития сего к богу". И тако воспрянув от сна своего, и велми ужасеся о видении том, и размышляше в себе, яко "аще отъиду от сего места, боюся явления сего и показания месту. Яко господеви угодно, тако и будет". И помысли, себе глаголя: "Аще же ли поиду к великому князю и увещати меня станет, однако не хощу в доме его быти". Сие же ему мыслищу абие приидоша в той до оный лес некия ради потребы мужие княжие зверей ради. Отрок же позна их и прикрыся от них; они же видевше крест и хижу и удивившеся зело и глаголяху друг ко другу, яко есть человек тут живяй, и тако начаша искати и обретоша его и познаша, яко "той есть отрок князя нашего". И пришедше к нему, и поклонишася ему, и возрадовашася о нем радостию великою. Той бо отрок по пустыни хождаше три лета и вящше, и не виде его никто же, и бе питаем богом. И тако вземше его с собою и ведоша ко князю и сказаша ему вся, яко "великий князь печален бысть зело о тебе и до ныне; аще же увидит тя жива и здрава, возрадуется о тебе радостию великою". Он же сия слыша от них, с веселием идяше с ними. Егда же прииде во двор великаго князя, и вси узревши его возрадовашася велми о нем и прославиша бога и возвестиша о нем великому князю. Князь же повеле ввести его в верхния палаты и виде отрока своего и возрадовася велми и похвали бога. Он же поклонися великому князю и рече: "Прости мя, господине мой великий княже, яко согреших пред тобою, опечалих бо тя зело". И рече к нему великий князь: "Како тя господь бог хранит до сего дня и времени?" и облобызав его. Он же поклонися до земли и рече: "Прости мя, господине великий княже, яко согреших пред тобою"; и исповеда вся о себе по ряду, како изыде от него, и како бог приведе до сего места. Князь же о сем велми удивися и прослави бога и повеле своим предстоящим, да дадут ему всю его первую одежду и да будет в первом своем чину; он же со смирением рече: "Господине мой великий княже, я не того ради приидох к тебе, но да ты от печали свободишися и прошения моего да не презриши: молю тя и прошу, да повелиши то место расчистити" - и вся поведа великому князю, како ту прииде и како явилася ему пресвятая богородица со святителем Петром митрополитом московским и место показа, и идеже быти церкви во имя пресвятыя богородицы, честнаго и славнаго ея успения; и вся ему сказа о себе по ряду. Князь же, воздохнув велми и прослезися, и отрока похвали, яко таковаго страшнаго видения сподобился; и обещася во всем помогати месту тому до совершения и беседова с ним многое время и повеле ему своим предстоящим пред собою поставити пред ним трапезу, да вкусить брашна; он же вкуси малую часть хлеба и воды, а иной же пищи отнюдь не прикоснуся. Великий же князь повеле по воли его быти и тако отпусти его с миром идеже он восхощет. Отрок же отъиде на место свое и по обычаю своему моляшеся богу и пресвятей владычице богородице и на помощь ея призывает о создании обителя тоя, и тако молитвами пресвятыя богородицы вскоре дело совершается.
      Князь же великий повеле вскоре собрати крестьян и иных людей, да росчистят место то, идеже оный отрок покажет, и посла их ко отроку. Слышавше же то граждане и сами мнози идяху по помощь месту тому; и тако вскоре очистивше место, еже отрок показа им, и возвестиша великому князю о сем; князь же прослави бога и отрока своего о сем похвали. И тако сам великий князь прииде на то место и виде его сияюща паче иных мест; отрок же паки припадает к ногама его и молит, да велит церковь создати древянную и монастырь взградити. Великий же князь вскоре повеле всем прежним людям тут работати и мастеров добрых собрати к церковному строению. И тако божиею помощью и великаго князя повелением вскоре дело совершается, и освящение церкви сотвориша. Бысть же ту на освящении церкве Успения пресвятыя богородицы сам великий князь Ярослав Ярославич и с своею супругою великою княгинею Ксениею и со всем своим княжиим сигклитом, и всем трапезу устроил; и по прошению отрока своего великий князь даде ему игумена Феодосия и братию собра, и колокола устрои. И назвася место то от великаго князя Ярослава Ярославича Отроч монастырь; и вси прославиша бога и пречистую его богоматерь. На другий день по освящении церкве тоя той отрок Григорий пострижеся в иноческий чин и наречен бысть Гурий от игумена Феодосия. И той отрок, по пострижении своем, немного время поживе и преставися ко господу и погребен бысть во своем монастыре.
      По преставлении же блажевдаго онаго отрока немногим летом мимошедшим великий князь Ярослав Ярославич и великая княгиня Ксения изволили в том монастыре создати церковь каменную во имя пресвятыя богородицы честнаго и славнаго ея успения, с приделом Петра митрополита московского чудотворца, и села подаде к тому монастырю и место то насели, идеже бе отрок прежде пришедый.
      Монастырь же той стоит и до ныне божиею благодатию и молитвами пресвятыя богородицы и великаго святителя Петра митрополита московскаго и всея Руссии чудотворца.



   назад       далее   

Rambler's Top100